ابوذیّات عاشقات
زمانی اهموم فوگ اهموم لمهن
او گلبی من گرب للعشگ لمهن
اودّی اطروش یمته الوعد یمهن
ترد و اتگول متحیره اشبدیّه
***
الگلب غابه او جفن عینی دوالک
ابظلام اللیل متنومس دوالک
اذا دمّی شفه الجرحک دوالک
فداگ الروح طمنی ابلا وصیّه
***
هدیّه الگلب رضّیته ملک لک
او بعد لتغیّر اطباعک ملک لک
کریم او طوعة القادر ملک لک
اذا انته امیر اویاه سویّه
***
ثجیل الحب صبر لیلی لعابه
او کثیر اجناس طمعانه لعابه
ابو گلب الوفی صاغه لعابه
یقدّس بیه ملک صبح او مسیّه
***
ابوضوح الشمس لچنی الهمس و ارویت
شبچ و انذب علی وانصدت و ارویت
چنت عطشان احس دردشت و ارویت
روانی الحب عذب مایه ابهنیّه
***
صبح طیر الولف ملتهف و انصاد
او حط اعلی الگلب منقذف و انصاد
انا الصیّاد اهف کالحوم و انصاد
ابنظرت عین شد جنحی وادیّه
***
الیهون الگلب لا لا لامهینه
او قصد للحب مقامر لامهینه
یفز حلمان یصرخ لا مهینه
اتسودن وانه ادگ و الطم بدیه
***
سلیم الگلب من حبّک و دارک
ابوکت العوز الک طاقه و دارک
سکنته ابثالث احلامک و دارک
ارحمه ارجوک لتمسّه اباذیّه
***
عزیز الروح مر و ابتسم واحلاه
البراطم تمر تنگط عسل و احلاه
لون لحظه اشم الصدر واحلاه
الموت ایهون الی والفوز الیّه
***
گمر ظاوی اعلی روض الگلب شفته
او تمر گنطار فوگ الصدر شفته
لون یقبل ابوسه ابوسط شفته
اطلبت منّه او منعنی او عم علیّه
***
غزال او شاد خشمه علی میمر
یغنیلی نغم بطوار میمر
الغیره ما ابیع الروح می مر
حلو واللیل ما انام اشبدیّه
***
اریدن ولف یشفی الصدر یا حی
و اسهره ابروض لیل الشتاء یا حی
شفت بالحلم صوره او صوت یا حی
ابحی الورد لو حی المنیّه
***
الولف حیران من ون وانتهینه
العمر خلص متی وان وانتهینه
اود اویاه اعیشن وانتهینه
یگلّی الصبّر و انا النار بیّه
***
عطاشا او ولف ساقی مایملنه
اعزاز اعلیه طلعنه مایملنه
ابصحاری الحب سکرنه مایملنه
انتمشه اویاه و الدنیا زهیّه
***
جاسم ثعلبی (الحسّانی) 0802/1397
:: برچسب‌ها:
ابوذیّات عاشقات ,
:: بازدید از این مطلب : 2099
|
امتیاز مطلب : 0
|
تعداد امتیازدهندگان : 0
|
مجموع امتیاز : 0
عضو شوید
عضویت سریع
آمار مطالب
آمار بازدید
