سفیر الحب

ابو ذیات صاعقات

هلک ما بیهم الیرشد و الی عون

هلک ما بخلوا الجالس والی عون

هلک من المرض دائم والی عون

جسد مطروح و ایتانی المنیه

***

هلک مختال للصاید ثمرهم

هلک لو ما زهوا بالطگ ثمرهم

هلک ماهم هلک ما هم ثمرهم

دبه ابنار شلوا او ما کو میه

***

هلی بالعوز ما بخلوا تمرهم

اطلعت بد ذات ما غزر تمرهم

هلی ضیم  الخلگ دایم تمرهم

هلی همه المضیف او بیت الاجواد

***

انا خیگانی لا ثعلب و لا سار

ولا مطلوب الک عایز و لا سار

ولا عندی خبث مثلک ولا سار

حسانی النسب و احسب علیه

***

بعد لا تلعب ابگلبی نزف دوم

احنه اسباع بالحومه نزف دوم

الجمال ایلوگ للعاشق نزف دوم

ولا همنی الوکت مزعل علیه

***

ابن سلمان ابن حسان و انعام

هدینه البیه وفا بوسات و انعام

احنه اهل الکرم و الزود وانعام

ابطن عینک ملح ذم الخویه

***

جاسم ثعلبی (حسّانی) 28/06/1393

هوسات تخص مکر النساء

ما اذم المره الطاع المره خسران

بیهن بت عشیره او تعدل النسوان

او بیهن تستحگ بس ترعی الطلیان

لو تاهت بالحگ دلیهه

***

المره تاج الذهب گال النبی اکتابه

اذا طاعت اهلهه اصبحت حبابه

و اذا تمشی ابفکرها اتسبب اطلابه

الشر لو طایر تبلیک ابیومه

***

المره نار القیامه او کلهم ایشهدون

اهل المرجله و اهل العلم و الکون

اذا تکسب رضاها امسودن او مجنون

بس بالحگ حگهه اتباریهه

***

المره شکل السفینه او للبخت شاره

المره بالبیت ویه الرجل خطاره

اذا عافت اصلها او تشعل ابناره

الحگ یذبحهه او یجلیهه

***

المره اصل ونسب متروسه کلهه اعیوب

لا تکشف سترها ابذل تضل مسلوب

جزازه امهشمه و اتجرّح الحاسوب

کلما تکسرها اتمس بیهه

***

المره الما عدهه ذات امگمره او نیه

کدیشه امحمره او ما تسوا ترچیه

طویل السانهه او ما عدهه تربیه

اترکهه الدق یاکل بیهه

***

المره لو بنت ابوهه او للرجل دیوان

تاج الراس تبگی و الحسد خسران

تنجبلک طوایف و انت عالی الشان

حضّک لو مایل تچیله

***

المره الکرمت رجلهه هذا حق معلوم

بکتاب الرساله  ابکل نطق  مفهوم

اذا ذمت او گرگت تصدم الملچوم

یتحمل کل شرها ابذاته

***

المره الملسونه غدره امعذبه الجیران

السکن ویاهه احمق (حشا السامع) لو عظیم الشان

تمدد  بالمکر ما تسوا نص اغران

شیطان اخرس یظهر بیهه

***

اخ امن المره لو دردمت باللیل

تشلع بالگلب و اتبطل التحلیل

سوالفهه مکر بالخوه حیل اتعیل

تشعل بالشر و اتداعیله

***

اخ امن المره الماعدهه تربیه

تستاهل تدگهه ابروطه مچویه

حگهه لو تذمهه او تبغی منسیه

کل یوم اتبشّر بطلابه

***

عوف المستحی واکسر خشم ملسون

یتعده اعلی خلگ الله ابشتم ملعون

اذا ما راد جوره ایحمل او ممنون

لو لرد لحبابه ایطردونه

***

الرجل مثل الگمر یشتل ورد سمعیت

الرجل غیره او حمیه او فخر راعی الصیت

الرجل مثل الشمع یضوی او یضوی البیت

بیت البیه هیبه امکرم یصبح

***

بالک من مکرهن لا یغث زودک

آخر هوسه ادگ لک و الزم احدودک

الجنس شکل الحواری او یگطع ازنودک

اتحدر والله اتحذر لو اجت فرحانه

***

بالک یبن عمی امن المره ابنیشان

تجیک امدحلبه و اتسایس الفرسان

متحمره او تمصلح تشبه الثعبان

اتحذر والله اتحذر لا تگرب لیهه

***

الاسد لو شاع صیته اتبشر اخباره

یضل تاج العشیره او کرم خطاره

اذا بیته اصیله اتمرحب الداره

لو بخلت ضرت بعلومه

***

المره الطیبه الحنونه ابستر مضمونه

عگیطه امدهوره کل مره الملسونه

ابکل اطلابه تظهر ملسه مجنونه

عوف الذل واسکن باذلاله

***

احترام الزوج واجب فخر بالجنه

اذا یگرب مصیره ابموته یتهنه

المره الما وفّت ابحگه ابکبر سنه

و المشعل حگهه امتانیهه

***

جاسم ثعلبی (حسّانی) 26/06/1393

هوسات جارحات

شلک باللحم و اللحم حگ الدود

او شلک بالصدیق الما یگص لک عود

عفیه اعلی الحضرها اوبیده دگ احدود

بالحد ایهلیل شاجوره

***

داوی جرح اخوک او باچر ایداویک

ابن عمک رفیجک بالحگ ایداعیک

اذا عطشان بیره  ینبع او یرویک

الحگ لو جالک لا تگطع راسه

***

اصل عدنه الکرامه او اصل عزتنه

المراجل طومرت ما وصلت الحدنه

تضل فوگ النجم متعلیه رایتنه

و اتهوس ذوله اهل الغیره

***

بنت البیت بالک لا تشک بیهه

اتهذب بالکلام ابسکته داعیهه

اذا مظلومه تطلب من یواسیهه

اتعدل واشتل لک هیبه

جاسم ثعلبی (حسّانی) 26/06/1393

ابوذیات مغامرات

عزیز اتعز علیه او جنبیتک

بعت بیت المحنه او جنبیتک

شریکی اتنور گلبی او جنبیتک

انتظرتک ما شفت منک ردیه

***

الگلب ما حب شخص غیرک و لاحن

اسهام الفرگه جرحنه و لا حن

علیک اشعار اجر وانغم ولا حن

شکیت اهمومی عندک مو بدیه

***

ترف خدک زبد ناشف و سرنی

کلامک ما طبخ عگلی و سرنی

ابحلیب امک قسم اقسم و سرنی

اریدنک وفی او صاحب حمیه

***

هلال الفرح بانت شاره منه

کریم او شار عگله او شاره منه

البخیل الی تشوره شوره منه

یبیع اسرارک ابخفیه او اذیه

***

جاسم ثعلبی (حسّانی) 25/06/1393

ابوذیات قاذفات

حرت بهموم گلبی اقسام و اشکال

الدرب سدوه علیه انذال و اشکال

یهلهلی الزمان ابزود و اشکال

یحسب منتصر وآنه الضحیه

***

تهلهلی زمانی ابحزن مالک

تضن گلبی حلالک صفه مالک

کثیره احباب من خربصت مالک

یوسف ما رحل یرجع علیه

***

جبل صامد صبر گلبی و لا مال

عواصف ما تهز صیته ولا مال

لا یطلب سعد مقبل ولا مال

یرید الاجر دنیه او اخریه

***

نشرت اهوای من طبعک وزارک

غشیم او فاتح اثیابک وزارک

تغثنی و آنه ادگ بابک وزارک

حجابک ما منع غیث البریه

***

رعیدک یا مطر ما ضر ولا مر

ولا ینجز ثمر حالی و لا مر

ثگل حچیک جرح گلبی ولا مر

کفنی وابتعد لاتمر بیه

***

طردت الی یودنی و انه حلّه

انت الزم ضمیری و آنه حلّه

بیت اهلی الغزیته و آنه حلّه

تشوف المر اذا مریت بیه

***

همت ما بیه انهض وانسبتنه

انتکلت اعلی الیودنه و انسبتنه

ما سرنی الیودنی و انسبتنه

البیت الگلب و انت الروح الیه

***

هواک العذبانی دوم وانجر

صرت نجار ادگ بالفاس وانجر

اجرّک للعشگ یا ترف وانجر

العشگ ما دام بیت اهلی الوصیه

***

الظلم ما یبنی قصر النصر یمنه

ولا اادم سکن و استکن یمنه

ملک الموت وکت الخبر یمنه

بس الکفن یبرالک هدیه

***

ما همنی الشتمنی او ظلم وابرا

ولا جلاد یضرب عبث وبرا

یهمنی الشگ چلوتی او زرف وبرا

عفاه الموت و آنه النار بیه

***

بعد بس العتب والنوح یاروح

ضربنی الزمن سیفه الفتن یاروح

جسد ضامی الک منسدح یا روح

اخذ ثارک او ذبنی ابکل نویه

***

الدهر دولاب دولبنی وذبنی

عذابه ما کفی ابگلبی وذبنی

شوانی ابحفنة اسمومه و ذبنی

او جعلنی الزیت یشعل نار بیه

***

جاسم ثعلبی (حسّانی)  24/06/1393

ابوذیات شهل العیون

هویتک یالهویت الگلب وارجاک

تهنه ادخل هوای ابسفر و ارجاک

زلال انت و الساحل عطش  وارجاک

بحر حبک غمیج  او عذب میه

***

اعیونک شهل مثل الگمر هلّن

ابعجل گلبی انتخب بالنظر هلّن

ابجفاک ادموعی ما بطلّن هلن

اذا اشوفک ترد روحی علیه

***

الگلب حبک غفل جیتک وریتک

عزیز او ما اجد مثلک وریتک

کثیر امن الورد ذابل و ریتک

عطرها ایفوح و ایحشم علیه

***

العتب برجاک صببرته ولا مر

عنید او ما حمل نوحی ولا مر

ابغیابک اخو ما زرته ولا مر

انتظر سلطان گلبی ایرد علیه

***

المصایب گوطرن خلفی و شلهن

نزح بیهن جفن عینی و شلهن

لاهن عون اباریهن و شلهن

حفرن لی گبر و التهن بیه

***

جاسم ثعلبی (حسّانی) 24/06/1393

هوسات علی الخوان

علی الخوان انوحن و اسچب ادموعی

فتنه  البیه رده و امگمر ابلوعی

شوانه البیه رده او حارگنه وسط النار

یرید ایذم اخوتی او یبگه راعی الدار

یرید ایذم اخوتی او یرتفع صیته

یطشر بالجماعه او یبنی اببیته

یطشر هالمصیبه او ما اله رداد

معروف الفتینی او یشعل اشما راد

معروف الفتینی او یگرگ اهوایه

ابغیبه او نمنمه و امکمل الحچایه

ابغیبه او نمنمه او کذبه یعرفونه

ماهو ثقه او صدقانه یذمونه

هی ابعد منه ابعد ، لو جاک ابیومه

***

تابعنه الدهر و ایغازل الصدقان

شیرید العریضی ایفردش الخوان

شیرید العریضی ایفسر احلامه

یطشر بالعمام او صاح ابو شامه

یطشر ما یهاب ابغدر وگفاته

عند اهل الکرم مردوده چلماته

اهل غیره او حمیه او زعل مایردون

ناسین الخباثه او کلهم ایشهدون

کل اهل العشیره ابضیجه متحدین

یطوفون الزعل بالخوه معتمدین

ما یدخل سلفهم الی خطاره

مضایفهم مشایخ و السمح داره

و الدله التهلهل و العتب موجود

فنجان اگهوه ایفصلهه عود ابعود

ادلل والله ادلل ، هذا البیه هیبه

***

جاسم ثعلبی (حسّانی) 23/06/1393

من هویتک

عدلتنی او عدلیتک

واعدتنی او ما لگیتک

سهرتنی او عذبیتک

تذکر ابسد الصریفه من حچی الباطل نهیتک

وینه جاهک وینه صیتک

اتمرجل او اشتل ثنیتک

هذا فانوس السعاده

او ذاک محراب العباده

او خیریتک

لا تصیر اثبات تربط عزم اهلنه

صیر چفیه اعلی راس المحتمی الحافظ وصیتک

زینه بیتک

گوم ثبت لک هویتک

ما نسیتک

رایه تهتز بالهوا ابروحی شریتک

من هویتک

***

وینه طورک وینه بیتک

و انت بالگاهن تغرد عاتبیتک

المردی بیدک

تدفع المشحوف و اطرافک تورد

اشفی هورک

محتمس عطشان بس الدنیا ترعد

یا مطر غرج ثنایا الحب رهینه

اتزور واتحج

یا ثواب   المات کمل لک قصیده

ابگلبی تبرج

وسعه نورک

لم فطورک

ما جفیتک

 من هویتک

***

هیه هیه

صرت عزرائیل و اتزف المنیه

و آنه مثل المای ساکن فوگ خد ها

والارض تنشد علیه

کنت محتار ابونینک و ابحنینک

هسه طربسنی الوکت و اچفوفی غطن

هسه بیدرنه اندهس و الغربه تمن

هسه شال البیه وفه ابعید او تامن

هسه ماکو افراش للمبهوته روحه

اتخبلن شرحات گلب النزف دمه

و العذاب اشکال بهمومه ایتمحن

ابچن ابچن

یا عیون السائلات اعلی الخدود

ما وصل عطر الربیع الحزنانه

ایفک حزنه

الواشی ینجن

عینی اربن

ما شفت لمعه خفیه

امن السماء اویاها وصیه

بیتی اضحکن

والمجانین الربوا ببیوت اهلنه اتمردونه

یا به اسکتن

لا تمزحن

هلهلن لمن غضب عالمرمرونه

داده اهجمن

جیت اگولن للجبل هس لگیتک

ببره ننبش گلب بیتک

انتظر  وصلت قضیتک

حبه حبه هدمیتک

ردت  امش افروع ظهرک

شمه من نار الخیانه

ما نسیتک

مو چسیتک

من هویتک

***

جاسم ثعلبی (حسّانی) 24/06/1393

جنه او نار

کنت بالجنه بیتی او مهجتی الاشعار

ذممنی الوکت واحتار

والشاعر اذا یمدح هوی الشیطان حقه النار

شفت یا ما شفت شوفات

نده زیت الدلال ایفطر العطشان

او فنجان العباده امجالس التیجان

او هودج جمل حمزه بالوجود اشهود

او عصة موسی فوگ الراس شمسیه

او ملوک الدنیا مختجله او عبید الناس

اظن ذوله البشر همه الحرامیه

او کلو فصل الیتیمه او فصل بوشیه

اکمّل لو اخاف اباذنی ترچیه

صگد لو گال ابونه الحذر لا تحچون

اخاف الطوف یسمع و االارهابیه

هذوله الحاکمین الدیره کلهه اضباع

ماهم انس بویه ذوله دمیه

هذوله اتمردوا قتل البشر والدین

هذوله البشرونه بالنهب و العار

یسموهم حماة الدار

جنه او نار

***

وین الجنه وین النار

وین احفاد طاها او وین ابوالحسنین

وینه الفاح صیته او کاتم الذنبین

او وین ابن السلیمه الفاقد الکفین

الدین اقسام صایر والوکت صوبین

الجرح ما طاب

گطع ارگاب

ما نعرف اللمعه من ضوا المحراب

قتل الابریا بالسیف دون اسباب

ما سامع ظلم یتعده شیب او شاب

ولا سامع طفل یتدنه لیه طلاب

بس سامع کفر و القاتلین احسین

رامینه ابسهم مو سهم لا سهمین

وصل وکت العزیمه التنتخی بلثار

جنه او نار

***

جریده اعتاب عندی او مدری اهیمن وین

اهوای ایرید امدحه و اغسل الکفین

الزمان ایلوم بیه ایهلس الصوبین

الدهر یطلب علی عتبات دون اثبات عین ابعین

والدنیا طریده اتنوح انه امنین

الشمس تنشر قصاید و الشعر بیبان

الگمر طال ابظهوره ایغرج التعبان

الشمال ایهب هواجس یدفن الخسران

الغریب ایرید داره او یطرد البردان

المطر شایل اجنازه امدهور او حزنان

العتب سهران متونس مع السلطان

البحر تارک ضمیره ایغرج الغرگان

الاخوا هم سال سیفه ایبارز الشجعان

بسکم والله عار ابعار عار ابعار

جنه او نار

***

مثل طیر الحمام الغیره تتلوه

شنهی من وکت بالینه بالگوه

اذا گلنه عرب جانه الرهاب ایحود

اذا گلنه عجم کسری الخلق معبود

 اذا گلنه کرد لابس اهدوم السود

اذا گالوا خوارج حضکم المسعود

اذا گلنه اسلام ایگول یا اسلام

کم اسلام عدنه والدرب مسدود

سنی لا تگول اتصیر دمعه ابعود

شیعی تنتسب یا فرقه یا مگرود

اگولن حیل اگولن شیعی من زودی

الکعبه قبلتی او بس  ربهه معبودی

او کتاب الله حکمی ایبین احدودی

او طاها المصطفی او حیدر علی الکرار

اکسب منهم اوجودی

والحسین الشهید او عترته الاطهار سر جودی

والمهدی الغایب مسند الاحرار

جنه او نار

***

کل شی یبدی بالبدایه

او ینتهی باخر نهایه

غیر ربک اسمه آیه

ما نهاب امن الحمایه او ننتمی لهل الولایه

احنه برکان او غضب

احنه من صلب العرب

احنه من هور الهویزه ابیوتنه بردی او گصب

احنه ما نحتاج مرهم للجروح

نگدر انخیط جرحنه 

ابخیط ثلثینه ذهب

وین العتب

اصل او نسب

ریته الشعب

احنه تاریخ السعاده والعباده

آنه ما گایل حشاء ربنه الکتب ربنه الکتب

احنه مو جراشه اجینه

احنه بالبنیان عینی اتعذبینه

لا نهبنه او لا سبینه

او لا کتلنه او لا نهینه

الدار تشهد للسکنهه

روح گلهه احچی یدار

جنه او نار

***

جاسم ثعلبی (حسّانی) 22/06/1393

ما الوم .....

ما الوم الیحب لو گلبه شب ابنار

واهل الشعر لو غضبوا یحلونه

تطفّی نار همهم کم قصیده او بیت

حبیب التاه رایه ابلحظه یسبونه

***

او ما الوم الیتیم التابع الصفنات

امگمر بالعذاب او خاله تچایه

العم ما رحباله او ما بناله ابیوت

ولا ثبت له شبه او لا کسب رایه

***

او مالوم الغریب الحاط بین اجناب

لوسد باب بیته او ادب اطفاله

تمر مر السحاب اتزلزله العیلات

ساتر نفسه بیده امامنه اعیاله

***

ما الوم الشجاع الکرهته الخوان

لو عاف العمام او گصد خیاله

مثل حاتم الطایی الدگ عشر خیمات

یکرم بالضیافه او یذبح اجماله

***

ما الوم الیواسی او ما تقصده الناس

رجل غیره او حمیه او ربک ایعینه

عادل محترم صاحب وفاء واحساس

اذا عاف العشیره الکل یریدونه

***

ما الوم المطر لو دگ ثنایه البیت

یرید احباب تطلع حتی یسگیهه

اذا ضهضب علیهم نزل الحالوب

علامه امن القیامه ایرید یرویهه

***

جاسم ثعلبی (حسّانی) 22/06/1393

ما محتاج

ما محتاج جمره او تحرگ الدلال

او ما محتاج عبره اتغرگ ابروحی

ضیم الدهر کافی شربانی اسموم

محتاجک تجینی اتضمد اجروحی

***

محتاج المطر یغسل لی دمع العین

او محتاج السهر یشکیلی عن حالی

سیل امن المصایب غرگته او طاح

و اضباع الشماته ابغدر تبــرالی

***

ما محتاج تحزن علی لو جــــــــفّیت

ولا محتاج یوم الدفن تحـــــــــلالی

اخذ وردة جمالک و ابتعدنی او عوف

عینک سبب موتی او شلت احوالی

***

جاسم ثعلبی (حسّانی) 21/06/1393

مو مغرور

بس اکره کلام الزور و الشمات

و اکره کل بشر بد ذات

ولا اعاشر صدیق الیحفر النه اقبور

مو مغرور

مثل کل نخله متعلیه

ابعثگها الخضراء متحلیه

الکصب والزور ما ذمهه و لا ذکراها بالمنشور

مو مغرور

الگلب مطرور

صرت دخان صاعد بالهوا او خجلان

یبوس الغیم

احس بالغیم مثل الفجر یربی او بالشتاء بردان

و احس موگد اهلنه ایغازل التربان

او گلبی امجفف او منذور

مو مغرور

طفل یلعی الشعر وامگمطه نص اللیل

الناس امدده او تتحلم اوصافی

و انه نایم چفی حتی انسه طیفه اویای

ولاکن هالشعر ما کفنی متعافی

او شب ویای طول ابطول

حارمنی الوناسه او حارگ الحافی

او گلبی ملتهب من ناره ظل ایفور

مو مغرور

سرت طیر او طرت ترکیته الملاح

دوم الدهر متحزم یهد باسلاح

شفت اطباع منه او من غدر حاله

یصید البگه بهمومه او خطا اجماله

او مشیت ابعید

یوم العید

بس آنه او جنطتی او بیتی و ادلاله

کسرت السکته بیدی و الفکر محضور

مو منصور ولا مسرور

الوچ ابناری و اتلاهب  عصاء ابتنور

مو مغرور

او تبعانی الوکت خاطف منایا اهوای

لچم جرحی النزف باحلامه ذمانی

جلسنی ابدار ظلمه او صکک البیبان

جسد مشبوگ وسط الگبر غطانی

احس خجلان

مو خجلان بس امعاشر الحرمان

او سهرنی ابعذابه او بیدی حط نیشان

غشمرنی ابزعل واتهاده ابن رضوان

ذوقه ما حملنی امبلل او مشرور

مثل هاون صرت صوتی یرن و ایفور

مو مغرور

من یوم الصرت و اتعلمیت الاه

شربت المای من آیات ربی او ضگت لذاته

او عرفت البیه رده للناس

ما یغرگ ضمیره ابموج مداته

او عرفت الناس میة طیف

مرسومه اعلی وادی الارض باغاته

بیهم ملک ما ینقاس

او بیهم بد وفه او بالدنیا عازاته

او بیهم سید او سلطان

اوبیهم حاقد او خسران

او بیهم بالسان اتلوگ هوساته

او بیهم عاقل او مجنون

اوبیهم بالمظیف ایعلی چلماته

او بیهم صاحب الصحبان

او بیهم خاین او مرفوضه طلباته

او بیهم بعد بیهم ما یسعنا انگول

اترکهم للمقابر حگهم اسباته

کلام الناس ما ینقاس ما شفته ابعداله ابکل ربیع ایزور

مو مغرور  ، مو مغرور

وحق رب التعبده امن الدهر مکسور

مو مغرور

جاسم ثعلبی (حسّانی) 21/06/1393

12/09/2014

خبر عاجل

خبر عاجل ورد یستاهل التبلیغ

کلمن بالعشگ وارط یعدمونه

بس آنه الوحید الما شملنی احساب

لان گلبی یود حتی الیذمونه

***

ذاعوا هالخبر واتحزموله احزام

اول صف وصل لهل الخفاجیه

آخر صف نظرته امتابع الغزلان

رجال او نساء خطفتها الحرامیه

***

واجت جیمه کبیره امن الشمال اتنوح

اسئلت زمزیرها بس عندی احچایه

امنین انتم یعمی و العذاب ایهین

گالوا کل سببهه امن اهل الولایه

***

اسئلت شنهی ذنبهم اهل قیل او قال

لو ما کو وفه او لا عدهم والغیره

رجائا لا تضیعون الگمر باللیل

قولولی السبب واحکم ابتفسیره

***

قال الدیره صلفه او عدهه سبع اعیون

تهد باسم العشگ و اتحنی ضحکاته

او تخربص بالغزل و اتشلع المنصوب

او یدردش بالمحبه او بالبحر ذاته

***

العشگ عدهم اسیر او تابع الذات

و احنه العشگ عدنه جنه مخفیه

نبیع ارواح لجله او ما نحرج بیه

و انشتله ابورد و انریعه یومیه

***

العشگ عدنه حلاته الزله و البستان

یستانس العاشگ لو سکر بیهن

یطیب اجروح گلبه او یکرم الخطار

او لو یبسن اعیونه ابدمعه یسگیهن

***

داعینه المحامی یکتب التقریر

احنه احرار حبنه مو ختل لونه

احنه انحب محبه او نفتخر بالصیت

احنه اهل الستر والدیره مجنونه

***

صدق فات ابکلامه او صدگته الناس

عند اهل القراء اصل او نسب موجود

بس اهل المدینه اتغازل التعبان

یخوطون الصداقه ابمهزله او بالعود

***

جاسم ثعلبی (حسّانی) 20/06/1393

11/09/2014

باب الجنه

ما نامن اعیونی و القوافی اتموج

یهوّس روج گلبی او بالبحر جاری

لطم بیت القصاید و الشماته اتضوج

الگمر بالسماء او ناطر لمعة اشعاری

***

العذر مشعل صفالی و النفاق ابروج

بعد ما اهاب حساده او تدابیره

شتلت الغیره بالصبخه او صبح بستان

روح اقراء ابهویتی او شوف تفسیره

***

الگلب یتمنی حاکم مو حکم وایلوج

اطوف الغیم و انشر صفحه مرئیه

و احط کارة حطب و اشعلها بالمختار

و ازیل الحقد من اهل العبودیه

***

مشتاق ابهواکم مو هوی المحبوب

انتم حب ضمیری او شهده وافکاره

حملت اهموم و اتحمّل بعد اهات

خل یقدف عذاب الدهر مسماره

***

گعدت ابلیله ضایج والدموع اتسیل

مرمرنه الدهر حابسنه بدموعه

حلمت اویاه طایر و الفلک بیبان

احس صولة عمامی اباذنی مسموعه

***

تهشّم جرح گلبی بس دواه حسرات

المرهم والصبر ما حنّا بسماته

رشیته ابملح زاد الالم منشار

گصص بالمجاری او او ختم چیلاته

***

تبلسم یا جرح مو کافی جفن اهواک

لف افتوگ جرحک من سفاء اعیونک

او شد حملک او شیله او لا تتانی النوگ

اهل النوگ ارشدک لا یحسدونک

***

المصایب و المشاعر تنحسب تقدیر

من ربک سببهه او هوه بانیها

یجی یوم او تضوگ العسل و التبشیر

دیار الخیر وسعه او هو حامیها

***

بعد لتلوم لا تتالم ابچلمات

طیع الله او رسوله او حکمه و اکتابه

و اعمل عمل صالح و انجی الغرگان

باب الجنه افتحه و انطر احسابه

***

جاسم ثعلبی (حسّانی) 22/06/1393

14/09/2014

ممنوع السفر

وحق ربک قسم ما شفته لون اللیل

هواک او عطر خدک بالشعر غافی

غرامه اطلب او فدیه لو غصب طبیت

داخل گلبی ممنوع السفر کافی

***

صرت طیر او تحومی اعلی الجفن حطیت

اترکنی او داعت الله او لا تبارینی

حذفت اسمک ابگلبی او کتریته ابعید

ضغط عندی شدید او لا تحاچینی

***

بعد کافی الزعل کافی الحزن و اهموم

روح الزم طریجک و انسه مکتوبی

احرگه ابنار گلبک یالخنت بالجار

او کحّل عین غدرک من کتر ثوبی

***

جاسم ثعلبی (حسّانی) 20/06/1393

12/09/2014

کتلنی المستحی

مثل طیر السعد خبلتی الگلوب

کتلنی المستحی من گتلچ ابهای

دمرتی الخلگ بعیونچ السود

الشمس شتعودلچ لو خالچ المای

***

انکشف غیض الدهر نورچ بالوجود

انرمیت ابنار هجرچ و آنه رمای

بعد یا یوم نتواعد بالوعود

اذا بیتچ غرگ و ایغازل الجای

***

طمس شارع نخلنه او دربه مسدود

سحینچ محتضر بس راید ادوای

صعدت اعلی الشماته او طفت الحدود

و اجیتچ معتنی واتفاسری اویای

***

جاسم ثعلبی (حسّانی) 20/06/1393

12/09/2014

لاتعاشر بدر

لاتعاشر بدر واتگول یوفی اویاک

لان حب الشمس و ایغیب لیلیه

الشمس خاین لگته امتابع النجماة

او کل خاین یخونک میه بالمیه

***

دعینه اعلی الدهر صلینه عشر اسنین

او شعلنه اشموعنه بالبحر مشایه

او کتبنه اشعارنه و اشتدت الهوسات

ما کفنه ابحشیمه او رافع الرایه

***

سد باب الحشیم او گام یشعل نار

یهین البیه وفه و ایدمر اوصافه

مطر یمطر زلازل من سماء او من گاع

یحطم بالبشر لیش البشر عافه

***

الدهر هوه البدر و ایعانق الشبعان

احس ابن الفقیر اهلاله شمسیه

و احس المات ابوه او شیّب او یه الضیم

الملامه اویاه صعبه امن العبودیه

***

بسک یا دهر ظالمنی بالشمات

تچردس بالمشاکل و امی علویه

عساک ابزوجه دبسه من نسل طرطیر

تراویک النجم بالظهر یومیه

***

جاسم ثعلبی (حسّانی) 20/06/1393

ابوذیات تخص الاولاد

علیه الهم صعد بثلاث و ارباع

یحن گلبی علی الغیاب و ارباع

اشعلامک یا گلب افتره و ارباع

البچی و النوح یثرلک اذیه

***

علیک العین دم صبت و ناحت

فجت ما مای غطانی وناحیت

الشماته اتهمش ابصدری وناحیت

اخلافک ما نمت لیلی ابهنیه

***

یدار العز رحلتو وین لا  وین

شگل للگلب لو ینتحب لا وین

انلوا گلبی بفراگک صعب لاوین

انتظر ربی یفرجهه علیه

***

یمن هجرک علی مکدر و عملای

اعلی شانک تارکت داری و عملای

غیرک لا الی صاحب و عملای

تعال او شوف گربت لی المنیه

***

رحت ما طاوعت گلبی ولا جیت

غسل هجرک جفن عینی و لا جیت

انت اترید تجرحنی ولا جیت

ابجفاک اتحملت کل الاذیه

***

اشتعلت ابنار و انت السبب یبنای

اترکتنی او بیک اشیل الحمل یبنای

روج الهجر طخ طخ علی یبنای

گطفنی ابعید واتشمت علیه

***

ارید اویاک اسلی الگلب ما رید

زلال انت و عطشت ابسفر ما رید

اخلافک لا اخو لا محب ما رید

بس انت الترد روحی علیه

***

چویت الگلب من هجرک و سمته

بعت بالرخص دلالی و سمته

لان عالصدر مرسومک وسمته

اخذنی اویاک واتدلل علیه

***

ابجفاک اعیونی دم صبن و هامن

وصل وکت السهر و المن وهامن

اود احفر گبر گلبی و هامن

و افوخ امن العذاب المر علیه

***

یون گلبی او صبر یلهم ولا طاب

علی المابیه وفه و بسمه ولا طاب

ما فاده ارسلت ساده ولا طاب

شعل نار الهجر وابعد علیه

***

متی یا گلب تفرح غفل و اتعود

مثل یعگوب عینی انطفت واتعود

اشمالک یا دهر فردشت واتعید

هوی یوسف وصل طب بالثنیه

***

جبل شایل حمل هجرک و اجر بیه

سکنت او جربت ذاتک و اجر بیه

تحمل من شتل عودک و اجربیه

الثمن جنه او رزق یضوی الثنیه

***

ردتک ما ردت دنیه ولا دین

حنانک بلسم اجروحی و لا دین

تولد گلبی بفراحک ولا دین

شباب اصبحت من اتمر علیه

***

یحومی الغدر بفراگک علی دار

او گلبک ما سکن واعلن علی دار

الدهر واهمومه و احلامه علی دار

یرید ایشوف غفله ایهد علیه

***

صبر گلبی جبل شامخ و لاهاب

اچم شامت گصد حرگه ولا هاب

الابو لو تارک اولاده ولا هاب

الزمن لو لچه یلفی الیا ثنیه

***

جاسم ثعلبی (حسانی ) هدیه الی ولدی ابوجاسم

20/06/1393 /   11/09/2014

عشق خسته

روزِ میلادت عزیزم ، جامِ سیمینم شکسته

هنوزم یادم نرفته ، خاطراتِ عشقِ خسته

می مونم اسیر  اشکات ، خوابِ غمگینم ندیدی

اومدم شبا کنارت ، وقتی از خوابت پریدی

وقتِ دیدار ت عزیزم ، فاصله حرفی نداره

سایه هام رسیده انگار ، چشمِ تو لحظه شماره

با تو بودن سنگ صبرم ، حسِ دلداری رسیده

دستِ پاکت تو ی قلبم ، رنگِ شادیها کشیده

ای غریب و همدمِ من ، این دلُ تنها گذاشتی

بی خبر رفتی همیشه ، صبرِ ایوبُ نداشتی

خسته ام از کوهِ یخی ، روی دوشِ خود کشیدم

دوره دوره بوی گرما ، ذوبِ غم ها رو ندیدم

تو نباشی ای طبیبم ، زخم دل خیلی عمیقِ

خاطراتِ عشقِ مونده ، می بُره شبیه تیغِ

مثلِ تک تک های ساعت ، روز و شب ها رو شمردم

سیل اوقاتِ فراغت ، پر نشد بی تو چه سردم

زنده ام اسیرِ دردم ،  تو اتاقی تک و تنهام

عکس تو با من می خونه ، از چشات می باره اشکام

هنوزم دوست می دارم ، بالگلب موجوده دارک

الیوم میلادک حبیبی ، دلبرم روزت مبارک

جاسم ثعلبی (حسّانی) 19/06/1393

12/09/2014

مجادله شعریه الدنیا و الشاعر

گلت مگدر اوصفچ فکری طیر او طار

مثل الجبل صرتی او محد ایلوحچ

اعطیچ القلم والدفتر او چلمات

و انتی اشما تحبی وصفی ابروحچ

***

قالت: اشترید اتلم علیه او حشمیت الناس

جرعتک وانت بیر او ساجی اعنادی

مثل زخ المطر من ینزل اعلی الگاع

چیلاتک یدگن جرحن افادی

***

گلت محتاز اشوفچ و اکشف المضموم

ابشعر وانغام اجیت الیوم اوصفنچ

طرگاعه علیچ امکشفه الضرعان

ما یقبل ضمیری اببیت اضرنچ

***

گالت لا تفرهد و الزعل مبذول

بیت الشعر صخره ابعود ادگنه

الم بیدر قوافی ببره ادوسه ابللیل

و اذا غثنی الشعر بدموعی احرگنه

***

گلتلهه اوصفچ بس وصف رمای

من ابعید شافچ غمض اعیونه

لان شمس او مزهیه او ما تضمچ گاع

الگمر من باوعالچ لم لم اجفونه

***

قالت یا شمس انه الشمس وامتاز

شنهی الگمر لو راید یواسینی

تراچی انجومه عندی و الفلک بستان

و انت اعلی الستر جاعد تداعینی

***

قلت یا دنیه عوفینی ابهوی المختار

حلوه امعدله او ما عندی احچایه

لاکن هم ذکرتی الجنه و الفردوس

اهناک اهل الجمال الترفع الرایه

***

گالت لا تخربص و الغزل تعبان

خلینی ابجمالی او سهر دلالی

اجر کلمن خطفته او غشه الشیطان

اشیخصک هذا مکری دبرت حالی

***

گلت لا خوف عندچ لا خجل لا لوم

الفقیر الماله احد لا تجلبینه

اجلبی ابن الثری و التارک القران

هاذ احزام ظهرچ والتحمدینه

***

گالت لا توز خلینی اگمط اسباع

کلمن عاف ربه او منهجه او دینه

اصیرن له جسر بالدنیا و اتفداه

گبل الموت اترکه ابحمله و اسنینه

***

گلت لیش الخیانه او لیش ترک الدار

مو انتی السبب طشرتی عشرتهم

عادیتی الخلگ دمرتی الطیبین

النار امضهضبه او طرشان باگتهم

***

گالت حق کلامک و الصدگ محبوب

ما باگت الدنیا احباب  مستوره

کلمن ذم اخوته او یخدم الدینار

سالفته تضل بالساحه محضوره

***

گلت والشاعر افتی ابیا مسیر ایسیر

هل بالدنیا جنته او لو یضل قاضی

یوصّف بالدهر و ایقسم المنذور

هل رب الکریم امن الشعر راضی

***

گالت لا توسوس بلغ  التوحید

لا تضرب حجر و اتدمی بشعارک

الشاعر لو ستر سر الخلگ و اهداه

یصیر اهناک یوم الفخر منضارک

***

گلت والی ابشعره یندب الحکام

او یهجو بعض منهم و اعلن ارسومه

هل هذا النهر یسگی شفاء العطشان

گالت بالدنیه ایشگگ اهدومه

***

الشاعر جاسم ثعلبی (حسّانی) 18/06/1393

09/09/2014

اغنیه و فسته باسم یون گلبی اشعلامه

جار الحدید و ما جار قلبی منهُ

حبیت بدراً صادق العبراتِ

تلاء لاء و النجوم تروی عنهُ

عسلٌ ، جمیلٌ . دافع الحسراتِ

حاورتهُ یوماً لاجتاز قلبهُ

شد الرحیل و التهب بالنغماتِ

فرجت عسری و ابتدعت جلبهُ

روحی فداک عطّر طیب جناتِ

***

 اشجرالک یا حلو ملتهب مالک

اخذ روحی او حنانی ملک مالک

اعتقد یا یوم احس بالگلب مالک

اشلعه امن العرج و اشهد علیه

***

یون گلبی اشعلامه ونته منه

احس تایه دلیلی ونته منه

نود نوصل طرفکم و انتمنه

طریج اهلک عسر و اصعب علیه

***

صدیج الما یمسنی شردمنه

سکنت ابعید عنه شردمنه

سبانه ابغیر عرفه شردمنه

اترکنه او ترد ناره سریه

***

عتب لهوای بالمکتوب ودیت

غرامه ایرید احن واشتاق ودیت

آخر حب شعلنی ابنار وادیت

لهیبه ابگلبی جالبلی الاذیه

***

ولک ملّیت منک و انت جاری

انت احلام گلبی و انت جاری

تعبت او هذا حدی و انت جاری

اخذنی اویاک لا تبخل علیه

***

جاسم ثعلبی (الحسّانی) 18/06/1393

09/09/2014

نفحات حسانیه

شهر اسجی ابعطش گلبی او شهر دام

شهر ینزف زبد فتگی او  شهر دام

شهر جالس و احل واعقد شهر دام

اشعملت اویای ترکیت الخویه

***

شهر مثل الثلج بارد شهر نار

شهر مظلم فگس عینی شهر نار

شهر مستانس ابحبی شهر نار

مثل ذکر الحمام ایقر علیه

***

شهر مثل العسل ذوقه شهر مر

شهر ما ینشد ابحالی شهر مر

شهر خادم خدم گلبی شهر مر

مثل قارون یتحکم علیه

***

شهر ما شایف الراحه شهر نوم

شهر ما اشتهی الوجبه شهر نوم

شهر اشتم هوی الشالو شهر نوم

تنمنم بالحلم چلماته بیه

***

شهر طایر حلم گلبی شهر حاط

شهر ساترنی بعیوبه شهر حاط

شهر تارکنی بالغربه شهر حاط

یروح ایروح و ایراجع علیه

***

شهر یکتم رموز الحب شهر صاح

شهر متمرض اگبالی شهر صاح

شهر یکذب علی جفنه شهر صاح

اذا رف جفنه محصولی الاذیه

***

شهر اشتل ورد بیتی شهر روح

شهر تدلل ابگلبی شهر روح

شهر دگ رمحک ابعینی شهر روح

اظن ترتاح و اتعاود علیه

***

شهر یختل علی مکرک شهر مات

شهر متجنب احبابک شهر مات

شهر تحسبنی محبوبک شهر مات

الگبر یشهد علیک انت المنیه

***

شهر تایه یدگ یلطم شهر عید

شهر ما یعرف الجمعه شهر عید

شهر شات ابهجر ولفه شهر عید

اذا میعید کاتبله الوصیه

***

شهر هد هد لبس تاجه او شهر بط

شهر خیط جرح گلبی او شهر بط

شهر عطر الورد شمه او شهر بط

التکرهه اهدیه یشتمه ابمسیه

***

شهر بر وبحر ملکی شهر شط

شهر طفّه الزعل گلبی شهر شط

شهر نسّم عطر طبخی شهر شاط

اعتقد شاط  الگلب غصباً علیه

***

شهر مسرور باحبابه او شهر هام

شهر ما ینحسب یومه او شهر هام

شهر ریشه علی صدره او شهر هام

ساعاته ابسنه ایمرن علیه

***

ک. جاسم ثعلبی (حسّانی) 18/06/1393

09/09/2014

فقرات ادبیه

سنه تحت الفقر عایش سنه ابخیر

سنه ابروج البحر غارگ سنه ابخیر

سنه بارد هوی حبی سنه ابخیر

اسامح والوکت یزعل علیه

***

سنه گلبی ابغنم سارح سنه ایمال

سنه عاشگ هوی احبابه سنه ایمال

سنه یطلب سعد حضه سنه ایمال

السعاده ابیا سنه تکمل علیه

***

سنه ما مال دلالی سنه ایمیل

سنه شایل حمل غیره سنه ایمیل

سنه تعبر علیه نمله سنه ایمیل

جسر صرت الخلگ تعبر علیه

***

سنه ایمرمر خبر خلی سنه ایسر

سنه یکتل رمش عینه سنه ایسر

سنه یمناه تشرلی سنه ایسر

خبلنی او بگیت اهذی اشبدیه

***

سنه محروگ محصولی سنه ایصیب

سنه جامد دمع عینی سنه ایصیب

سنه یکتل هجر حبی سنه ایصیب

السنین امطومره او حگی الاذیه

***

سنه متغرب الربی سنه ابعید

سنه کل یوم امر وانشد سنه ابعید

سنه بطبول ازف حلمی سنه ابعید

خونت الوکت وازعل علیه

***

سنه یمطر غضب گلبی سنه ایسر

سنه مفتوح للظایف سنه ایسر

سنه مسجون باهمومه سنه ایسر

او سنه جاعدکشف فوگ الثریه

***

سنه طشرنه خوتنه سنه انلم

سنه منصوره غزتنه سنه انلم

سنه کل شی ابفرح جاهز سنه انلم

او لملمنی الالم و احتار بیه

***

سنه ثابت مهر گلبی سنه ایجر

سنه ساکت طفل حبی سنه ایجر

سنه یرعا الفرج بیه سنه ایجر

او سنه محتار یمته ایعود الیه

***

سنه صامد ندم گلبی سنه ایخر

سنه ثابت نبض شعری سنه ایخر

سنه یحکم حکم عادل سنه ایخر

او سنه محکوم رابض بالثنیه

***

سنه یابس ثدی گلبی سنه ایدر

سنه محکوم بالفرگه سنه ایدر

سنه قابل قدر حبه سنه ایدر

او سنه مسجون و ایرید المنیه

***

ک. جاسم ثعلبی (حسّانی) 18/06/1393

09/09/2014

من سببنه

کل شی عدنه

اشما تطلبه الروح ماجود ابحلم متشوفه عینک

شهر ترکض بالشمس متوفی دینک

الغیره ماتت و من دفناهه ابگبر زفهه الیضدنه

اتفرهدینه

ما نعوف النخله و انتابع طلینه

کل شی ما عدنه او ربینه

مات ابونه اتعذبینه

امنه عدله اتحوس بس اتصدعینه

بالگلب مدفون ضل دایم حچینه

کنا اهل الدیره هسه استاجرینه

امن الاباده استضعفینه

بالشتاء و المای بارد

والمطر کسر شگصنه او ما رگصنه

و الرعید ابطوبه یرمی احلام مستقبلنه بیده او ما رحمنه

و المناصب نایمه ابموگد عزیمه  او ماکو غبله

او لو اکو غبله اعلی حدنه

اتشگگ ابخیمة حطبنه او ما سلمنه ، الوکت ذبنه

الجوع غرد بالچلاوی

او زاد ماکو

فورت بالمای حصوه ، امی الکریمه

او جعلت المرگه اعلی بدنه

او هم صمدنه

والربیع الیزهی معروف اببسمته

نفرش اتراب المحنه

ابهبت الریح او عطرها

اتحزم النه، اشگد حملنه

او لو اجانه الصیف نسهر

نومه حنضل والثلج تارک هممنه

امن الحراره انسیح بالشط

والسباحه اتشد عزمنه

ما سهینه

او ما نهینه

الشرجی ما یسمع حچینه

او لو خمدنه ابمای بارد امنی اترشرش علینه

 باصفری ایصوفر وردنه

الشط یزوع المای و ایعطش بلدنه

مدری تبغی الذکریات اشموع و اتفرح گلبنه

عمر عالجنه المظالم کل سنه التقبل علینه

مدری عدلین ابصمامه مدری متنه

اتهشمت دیران اهلنه

او ما بغت بس الملامه

واحد ایذبهه اعلی واحد

الجوع هوه المبتلینه

لو بلیناه اعلی روحه او ما ترکنه

انخیط اجروح المجفیه

تشتعل نار الخیانه

والامان اصبح مهانه

من سببنه

کل ثلث وردات تزهی، تزرع الفتنه اعی حدها

او ما حصدنه ، ابهمه زدنه

الدنیه خیر او کل شی امخضّر بارضنه

التعب للحاصود و المنجل یغرد

الحاصل العریس یچسیه او یذمنه

کل شی عدنه

او کل شی ما ناخذ ابد ضایع تعبنه

من حقدنه او من حسدنه او من دهرنه.

جاسم ثعلبی (حسّانی) 17/06/1393

ابوذیات و ابداعات

اهیم اویه الیهمنی ابهمم و الهام

هملته او ما اهم بالهمم و الهام

اهو هایم هوای ابحلم و الهام

یهین او هان من هیناته بیه

***

ملت ویه الجبال او علی مالن

او مع طبع الهمش و الغدر مالن

کرمت او عال بیه الدهر مالن

تملکنی او سلب حقی امن ادیه

***

فاح ابگلبی حبک وانت قل بی

او وصل للهام ذچرک و انتقل بی

بعید اشلون اغیرک وانت قلبی

الخیانه اویاک ما تشرف علیه

***

جاسم ثعلبی (حسّانی) 15/06/1393

07/09/2014

تتکبّر علیمن

غرگت ابشوگ هجرک دفنی بسکوت

اذا طبعک یحن لـــــــــی غربل المای

تیتّم گلبی عندک و ازرع اهمـــــــوم

خدر بیت الوفاء او من ناره صب چای

***

لا ما اگول باچر یوم الوداع

اعیش اویاک لو حد المنیه

دفنی امن البرد مطری بالعیون

او علّمت الصبر یصبر علیه

***

طفیت اسنین و انت امعلگ اشموع

و اغرد لک نعاوی او گلبی مجروح

تتکبّر علیمن یا سفه ابعین

حزن عمری ابکدر و امعذب الروح

***

انتهی وکت الوفاء او صکینه الدروب

او صفیت اعلی الخیانه خذهه الک ثوب

افتخر بالگلب حبّک عمره ما خان

و انت ابکل حدیقه اتحمل اذنوب

***

عندی اصور بگت من ذکریات الهور

اذا عذبنی گلبی اتشاوف اویاها

اسولف عالصور و ارموشک ایشهدون

الروح اتنوح واتحن و انت بلواها

***

لهمت السهر حنضل و الیقین اعتاب

و المندوم ضل اعلی الفجر غافی

تمنیت المصایب عندی جرعة مای

چا شربیت غیضک بس بعد کافی

***

جاسم ثعلبی (حسّانی) 15/06/1393

06/09/2014

دمّرت البشر

دمّرت البشر خبلت کلمن جاک

او کم عاقل سحرته ابنظرت اعیونک

حتی الفی الهوا طایر جلبته او صاح

سحر هاروت عندک لا یحسدونک

***

بس کافی بعد تمطر غضب و احزان

شجرت نوح شایل لک علی اجتافک

مو کافی زعل کافی حزن و افراگ

ذمّیت الورد واتبرّج اوصافک

***

اعیونک زلزله و اتهدم البنیان

او عطرک ریح صرصر هدم الغیره

ربک ما هداک اتحطم ابنیران

حبک چن رعید او شد شواجیره

***

مو هیچی العشگ سابی العرب و اتجول

تعللم للحنان او ضوگ محلاته

جرعة مای تهدی و البحر موجود

تداعی ابدول بیرک صحن کذباته

***

استانس للیکرمک و احترم طرواه

مو کل ثمره تحمر تنحسب لوزه

ولک حتی الگمر شاف الندم برجاک

صون البیه وفه و اتحزم العوزه

***

اخذ منّی النصیحه او لا تلوم الروح

ابیوم الجرجره بالفعل تلگانی

اجرمک لو کسرت الدله و الفنجان

تخسر لو تمس جاسم الحسانی

***

جاسم ثعلبی (حسّانی) 16/06/1393

07/09/2014

ارد ازعلک

ارد ازعلک یالعفتنی او سافریت

عفت کل شی الخاطرک و اتمرضت

انت بالتابوت وآنه اشتم هواک

غیر حصرات الگلب ما حصلت

اخلاف عینک من یخیّط لی الجروح

یجری دمی او ما اجد غیرک طبیب

رحت منی او مرمرتنی ابکل عذاب

غسّلت روحی ابدمعتک یالحبیب

اتمنی اموت اویاک و اترک کل اذاک

لفنی بعیونک ملح لاخر سفر

ارد اعلم الغربه و اکسب لک شفاک

واطرد الوحشه واعبرک کل نهر

یا شفای اشلون اعوفنک وحید

انت بیتی او دنیتی او عینی وراک

حبتک روحی او زهت لا تستغیب

انت تدری الگلب ما یحمل جفاک

اتحطمت وین الدرب و ارکض وراک

ماتن اریاحی او بعد ما عندی حیل

ارحم ابحالی اعتقد مسنی هواک

الله یدری بالعشگ جداً ثجیل

ریت اشوفک بالحلم وکت الممات

خاف ملک الموت یسئل علتی

ضحه گلبی ابحب غرامک و انتهیت

الله یرحم کل مرامی او مهجتی

للشاعر جاسم ثعلبی (حسّانی) 16/06/1393

07/09/2014

فارگنه العشگ

بس المحترگ یعرف دوا المحروق

او یفهم قصته او یفهم سبب موته

مثل طیر الرماه صیاده و اتحداه

الجرح والدم سباه وارگبته منعوته

***

فارگنه العشگ من یون اهلنه اصغار

او دفنه احلامنه ابدرب الفلاحیه

انخاف امن البلاء او تارکنه بیت الطین

او نصبنه اعلی المحنه اشباچ شمسیه

***

او کتبنا اعلی الجفن ممنوع صید اللیل

و الهوره غمیجه او سمچه متعافی

والبلام مستانس یحب ایطوف

والمفلاگه بیدی او شلعت اچتافی

***

عرس عند العرب والدله رنت حیل

و الکحیله الاصیله اترید رادتهه

خطار العشیره ایهوس اعلی النوگ

او بنت العم تگول اشحلوه گولتهه

***

الگراگد بالسلف متعلیه عالتنور

و الموگد کریم ایباشر اضیوفه

و الگطان معلوگ اعلی چفت المای

زلال الشط یحنی الروفه بچفوفه

***

المضایف والصریفه انملت بالخطار

مع ابیوت الشعر نسلت گصایبهه

فریج الدیره ماجوده المظاهر بیه

مدینه امعدله او حفت حواجبهه

***

للشاعر جاسم ثعلبی (الحسانی) 15/06/1393

07/09/2014

هوسه عملاقه بحق الاخوان

الیوم احل عجده ابدلیلی الیوم ازود بالحروف

الیوم ادگ الگهوه و افتر الیوم اشرب الما یشوف

الیوم اشد الکاره بیدی  الیوم اگص راس الخروف

وانلچم گلبی اعلی شانه او جالس ابداره او یطوف

والله عذبنه ابلبدته ایشگ جرحنه او  ما یروف

و الدهر حطم خیالی احساب دگ حرب الطفوف

***

لا تلومون المعذب و الوکت ذم بخوته

او لا تهینون  العلیل الرفع ایده  ابعازته

العوز عند الشگ زخمته اچماله تارک دیرته

رابض او ما عنده والی احساب ثگلت محنته

والدلال اتفوح یمه یشرب المر شهدته

بس بگه الگمگم یرحب و المضایف حبته

***

ارد  اذم کلمن خطاها او کلمن ایلوم الدهر

و الکرامه اسباع بیهه او ما تهاب امن السهر

و الحمیه  وصل حدها اگعد او شد المهر

الشمس ما تزعل علینه ادروب فک النه الگمر

جنه مبنیه اعلی شاطی و الشجر رش المطر

وسعه بالک روجی اجالک یا جبل طم البحر

ها اگعد جاک اعتابی ، ها و اعیونک محرابی

ها وینک جیتک جیتک ، ها بارسومک داعیتک

ها واگعد حصن بیتک ، و الطایح ربعه ایشیلونه

للشاعر جاسم ثعلبی (حسّانی) 14/06/1393